Rexuren erretratua berezia da guretzat. 2018an autokarabana estudio ibiltari gisa erabiliz egin genuen lehen erretratua izan zen. Kasu hartan, Altzoko bere baserrira joan ginen bisitan.
Rexu nahiko gizon ospetsua da inguruan, ez genekien zehazki zergatik. Gu haren erretratua egitera joan ginen, 70 urtetik gorako artzaina zelako, eta deskubritu genuen egunez egun baserrian lanean jarraitzen zuela eta bere bizitzaren zati handi batean Lasarteko Michelin fabrikan lanean aritu zela; baina laster jakin genuen bere ospea dantzari bikaina izatetik zetorkiola. Esan zigunez, gazte-gaztetatik kontratatzen zuten herriko jaietan, dantzaldiak ireki eta jendeak parte har zezan animatzeko; izotza apurtzen zuen dantzan hasiz eta gainantzekoak ere dantzara animatzen ziren berari esker.
Oraingoan ezin izan zuen bere burua erretratatzera etorri, baina pena zen bere erretratua Artxiboan ez sartzea.
Beti gogoratuko dugu bere baserrian igaro genuen arratsaldea, bera, bere familia eta bere ardiak pixka bat ezagutuz.
