Othmane, saharauiarra, gu agurtzera hurbildu zen, eta gure egonaldian egin behar genuenaren berri izan nahi zuen. Bere familiarekin batera parte hartu nahi zuen eta bere istorioa partekatu nahi zigun.
Bere emaztea, hiru alaba eta bi semerekin 6 urte daramatza Ikaztegietan bizitzen. Lehenago beste herrialde batzutan bizitakoa da eta baita inguruko beste herrietan ere. Ikaztegietako komunitatean bat gehiago sentitzen dela kontatu zigun.
Othmanek bere begiradan Sahara eta saharauiar herriaren istoioa dakar.
Mendebaldeko Sahararen istorioa konplexua eta mingarria da Othmanek berak kontatu zigun nola oraindik haurra zela, 1975ean bere etxetik ihes egin behar izan zuela familia osoarekin Aljeriako errefuxiatuen kanpamentuetaraino. Bide hori, oso gogorra, galera askokoa zentzu guztietan, non bizitza Marokoren aurkako gerraren erritmora eraldatu zen.
Haurra zelarik, beste haur saharauiar asko bezala, Othmane Libiara bidali zuten ikasketak egitera. Beste batzuk, Aljeriara edota Kubara bidaliak izan ziren. Gaur bere ogibidea, gurea bezala, argazkigintza da, eta Saharako bere irudiak, besteak beste, Italia eta Euskal Herrian izan dira ikusgai. Erakusketa hoien ardatza, bere herriaren errealitatea erakustea izan da beti.
46 urteko gatazken eta biziraupenaren ondoren, basamortuaren erdian dauden errefuxiatuen kanpamenduetan, ur eta elikagai eskasiarekin eta muturreko klima jasanez, miresgarria egiten zaigu beren kausarekiko duten determinazioa eta beren herriaren historia azaltzeko duten era sentitua. Mendebaldeko Saharan bakea eta independentzia lortzea helburu bat da bere horretan. Lortu arte lanean jarraituko dutela dio.
Zorionez, gaur inoiz baino itxaropentsuago dago. Afrikako Batasunak, Saharako Errepublika Arabiar Demokratikoa eta bere autodeterminaziorako eskubidea onartzen ditu. Espainia eta NBE bezalako erakundeak ezinbestekoak izango dira gatazka hau amaitzeko. Argi dago lurralde pobrea balitz, Saharako Errepublika Arabiar Demokratikoko banderak 1976ko otsailetik, independentzia aldarrikatu zenetik, izango lukeela bere lekua.
Bitartean, Othmane eta saharauiarrek beren istorioa kontatzen jarraitzen dute.
